كيف أكون إنسانة ناجحة ؟

بداية .. عذرا فهذه التدوينة بالعامية !!

الكثيرات يسألوني .. روضه كيف أكون إنسانه ناجحة .. كيف أثبت نفسي .. كيف أحصل على  A   كيف أتجاوز العقبات النفسية اللي تواجهني .. !!

هنا راح أصحبك في أجمل استراتيجيات الحياة " النجاح " .. النجاح هو الإستراتيجية اللي أنتي تحددين كنهها وكيفيتها ووجودها في حياتك ..

خلي كلمة ياليت و مستحيل وأتمنى .. على جنب .. وركزي على أقدر وأنتي تقرئين هالتدوينة .. جربي تتخلين عن نمطيتك بالتفكير .. وتمشين معي في رحاب أوسع ..

رآح أستعين بكتاب الدكتور ابراهيم الفقي " المفاتيح العشرة للنجاح " راح أطرح لكم المفاتيح وأعلق عليها من واقع خبرتي ..

يلا نبدأ ..

المفتاح الأول : الدوافع

مين فينا راح يسوي شيء بدون دافع داخلي .. من فينا راح ينجح اذا ما عنده محرك داخلي لهالنجاح !! من فينا راح يتعب ويسهر اذا هو ما يبي

الرغبه تحدد انطلاقنا للنجاح من عدمه .. يقول حكيم صيني : عندما تكون لديك الرغبة المشتعلة للنجاح فلن يستطيع أحد ايقافك "

أنتِ نفسك تحددين هالدافع مو بس تحددينه عززيه .. احرصي على أنه يكون متقد طول الوقت ..

بدون دافع بدون شيء داخلي يأنبك لما تتخاذلين ..يشد من أزرك لما تتعبين .. يقول لا يافلانه كملي أنتِ تقدرين أنتِ قدها .. عمرك ما راح تحققين النجاح اللي تبينه ..

الدافع ممكن يكون هدفك ممكن حلمك ممكن يكون كلمة انقالت لك وتبين تثبتين عكسها ممكن يكون طموحك ممكن يكون رد جميل لأمك أو أبوك ممكن يكون حلمهم فيك صح ولا لا !! دوري الدافع اللي فيك وأطلقيه ..

المفتاح الثاني : الطاقة

يقول أبقراط " الرجل الحكيم هو الذي يعتبر أن الصحة هي أعظم نعمة للإنسان "

أنا من الناس اللي من دريت بهذي المعلومة وأنا صحتي في المقام الأول ..

النجاح على صعيد واحد عمره ما يكفي وما يعكس كونك مبهر وإنسان رائع ..

النجاح الحقيقي أنك تكون ناجح على نحو رائع في كل شيء ....

لأن احنا لما نبحث عن النجاح نبحث عن الاستمرارية فيه .. ما نبي بيوم من الأيام نكتشف إن احنا قطعنا شوووط طويل في المقابل صحتنا سيئة ..

احنا نحتاج طاقه لهالنجاح اللي راح يستمر أعوام وأعوام بحول الله

كل اللي أقدر أقوله لكم باختصار .. حاولوا يكون غذاءكم صحي .. وسليم .. تمارسون الرياضه قدر استطاعتكم وتجنبوا العادات الغذائية السئية والضارة .. ثقفوا أنفسكم صحيا .. وابتعدوا عن الاجهاد المبالغ فيه وعن التوتر والقلق النفسي

المفتاح الثالث : المهارة

" وجود المعرفة أو انعدامها يمكن أن يشكل مصيرنا "

راح أختصرها عليك .. عزيزتي كونك دافوره أو تطمحين للوصول للدفاره بشكل أو آخر وانتِ ما تمتلكين مهارة البحث عن المعرفه وشغفك  فيها أحب أقولك نجاحك وقتي .. بصوره أدق نجاحك ماهو كامل ..

قبل لا تنوين تسلكين مسلك الناجحين اعقدي العزم على انك تستفيدين من أي معلومه تقدم لك .. احنا الحين تقدم لنا كميات هائلة من المعارف تدفق معلوماتي عجيب .. مو خساره ما تستفيدين منه !!

شيء ثاني حاولي تطورين مهاراتك الحياتيه .. بمعنى .. لا تكونين نمطيه تقليديه في حل مشاكلك مثلا .. غيري وجددي واصقلي مهاراتك في الحياه .. لا تخلين حياتك رتيبه وعلى وتيره واحدة فقط ولا تكونين البنت اللي عرفوها بالثانوي هي نفسها بالسنة الأخيره من الجامعة مثل ما نقول " على طمام المرحوم "

خلك مطلعه دائما .. لا يفوتك الركب وانتِ مسمره عيونك على مقرراتك وبحوثك

المفتاح الرابع : التصور

يالله هذا الخيار المتاح على مصراعيه لك وترفضينه !!

يعني تخيلي .. تخيلي .. تخيلي

يا كثر ياكثر الناس الواقعيين بشكل يجيب " الغلقه " ليه ماما !! ليه

انطلقي في رحاب أوسع .. الحلم حق اليوم هو واقع بكرا .. وحلم أمس هو واقعك اليوم

تخيلتي نفسك بالجامعه على وضعك هذا .. ترا هذا اللي صار

راح أحكي لكم عني شغله :: بالثانوي كنت أقول للبنات  راح أكون من الأوائل بالجامعة .. للأمانة ضحكوا قالوا روضه أنتِ تبالغين مستوى الجامعة أكبر .. يكفينا ان حنا متفوقين بالثانوي ..

دخلنا الجامعة .. تفوقت وصرت من الأوائل ولله الحمد من قبل ومن بعد .. والبنات !! رضوا بكونهم متفوقات الثانوي وبس ماتغير فيهم شيء

كل شيء كل شيء تحطينه براسك وتتصورينه .. اذا ربي أراد راح توصلين له وراح تكونين عليه ..

برناردشو شنو يقول !! يقول : يرى بعض الناس الأشياء كما هي ويتساءلون لماذا .. أما أنا أتخيل الأشياء التي لم تحدث وأقول لم لا ؟ "

لا تحرمين نفسك من أحلامك عشان كلمة لا .. مستحيل .. ما أقدر ..

المفتاح الخامس : الفعل

احنا كمجتمع دايم لما نمدح شخص نقول : " قول وفعل "

خليني اصيغها باستراتيجية النجاح لازم تكونين " حلم وفعل "

لا تحلمين وتتصورين وتروحين بفكرك لشيء وانتي لسه على السيف .. شفتو المثل الخليجي اللي يقول " شلك بالبحر وأهواله ورزق الله على السيف " !! أكره هالمثل ترى من كل قلبي

 ليه نرضى بشيء طيب عادي وما نجازف !! ما نتعب شوي ..

لا تصيرين من هذول اللي جالسين على السيف ويذمون خلق الله اللي انطلقوا

ولا تجلسين ع السيف وتتخيلين انك حصلتي على الدانات وانتي ما دخلتي البحر

باختصار اذا انتِ عندك حلم .. اشتغلي عليه .. لا تقولين لي ياليت ،، أنا أتمنى أنا أبي .. وين أفعالك !!! شسويتي من يوم حطيتي هالحلم براسك لين اليوم !!

البنت اللي بدت تشتغل على حلمها اللي حكت لي عنه قبل فتره تكبر بعيني أعرف إنها تقدر وانها قدها

شيء ثاني اذا انتِ اكتفيتي بوضعك الحالي لا تتكلمين عن ناس وصلوا وتذمينهم وتقولين انهم ضيعوا نفسهم ومتعبين أعمارهم

لا تكونين مصدر محبط لوحده تتمنى توصل بس جالسه تسمع لك.. لا تكونين سبب في احباط اختك أو أخوك أو صديقتك .. اجزم إن 100% من سبب تأخر الكثير منا صديقه أو أخت أو للأسف أم أو أب  قالوا  

" شلك بالبحر وأهواله ورزق الله على السيف "

المفتاح السادس : التوقع

راح أتكلم عنه بإيجاز شديد .. باختصار .. توقعي الإيجابية في كل شيء ..

تخلصي من أفكارك السلبيه من خوفك من الفشل ومن مشاعرك السلبيه

خلي سقف توقعاتك بالنجاحات عالي وبالبشر منخفض

المفتاح السابع : الإلتزام

من دخلت الجامعة حتى الآن .. الصفوة مازالوا صفوة .. تعرفون ليش !!

لأن عندهم هدف .. يملكون دافع .. عندهم تصور ..  اشتغلوا على نفسهم على هالهدف .. توقعوا الإيجابية والتزموا بهالشيء

لما تختارين يا عزيزتي هدفك وتحددين شنو تبين لازم تحسين انك ملتزمة بهالشيء عندك حس مسئولية تجاهه

أنا أبي انجح اذا أنا لازم لازم لازم أكون قد هالـ" أبي " اللي جالسة أرددها وأثبت أني قدرت أنجح

شفتوا عقود الصفقات التجارية لما توقعينها أنتي بالمقابل ملزمة بكل بنود هالإتفاقية اللي يا تنجح الصفقه يا تخسر بسبب بند ما التزمتي فيه وجزاءات قانونية ولوية ترا نفس الشيء بالنسبة لك

حطي بنودك الشخصية والتزمي فيها كافحي في هالحياة لا تكونين مجرد شيء يتمنى على الله الأماني وهو جالس

ويليام شكسبير يقول : " جاهد لآخر نفس في حياتك "

المفتاح الثامن : المرونة

دايم أردد على صديقاتي  : أمر الله من سعة !!

يعني نحاول نطبقها على استراتيجية النجاح الخاصة فينا ..

فيه ناس لازم تمشي حياتهم وفق الخطة الأولية اللي حطوها أول مره .. خلاص ما يبون أي تغيير ولو صار تغيير أو حصل أمر غير متوقع يقلبون الدنيا رأسا على عقب خلاص وخري عنها ..

طيب ليه يا أمي !! الحياة بدائل وخيارات متاحة وأمر الله من سعة.. هذا شيء

شيء ثاني في ناس عندهم كل شيء عباره عن ثوابت ما تتغير حتى تفكيرها اذا تغير تحس أنها ارتكبت جرم فاحش ليه ماما ليه !!

الحياة متغيره .. انتي تحتاجين تطورين نفسك وتتخلين عن أنماط تفكيرك السابقه .. حسني من نفسك مو حلو أكون روضه هالسنة نفس روضه السنة الجاية نفس اللي بعدها نفسها وهي طالبة ولا أم ولا سيدة أعمال !!

ترا شيء غريب .. جدا .. شيء محبط لك أنتِ اذا تظننين أن  حياتك يا طبيبة وبس يا مصممة وبس يا أم وبس .. !! مين قال محد حطك بالدائرة الضيقة إلا أنتِ نفسك ..  حاولي توسعين فرصك وتجربين .. وتعيشين بمرونة

المفتاح التاسع ..

الصبر .. فلسفة حياتيه رائعة جدا .. (الله فوق الله يعطي الله كريم)  .. هذا شعاري هالترم .. تدرون ليش ! اكتشفت هالترم اني احتاج الصبر .. عشان أكمل الناقص من استراتيجية نجاحي الخاصة فيني انا عندي دوافع وعندي حلم وتصور وأشتغل عليه وعندي التزام وعندي مرونة ..  احتاج أصبر أؤمن ايمان كامل إن ربي اللي خلقني وأوجدني وأعطاني بيئة خصبة لهالنجاح وسخر لي من خلقه ومن الامكانيات ما يخولني أوصل .. مو عاجز أبدا عن انه يعطيني ويكرمني ويارب ألهمني الصبر ...

ياحلو طولة البال .. ياحلو طعم الصبر .. وياحلو توفيق الله لنا .. شنوا احنا من غير توفيق الله وعطاياه !!

المفتاح الأخير : الإنضباط

أكتفي بالحديث عن الإنضباط بالاقتباس نصا من كتاب الدكتور ابراهيم الفقي يقول :

" لو بحثت في القاموس عن كلمة الإنضباط الذاتي فستجد أنها تعني التحكم في الذات فالإنضباط الذاتي هو الصفة الوحيدة التي تجعل الشخص العادي يقوم بفعل أشياء فوق العادة وهو الإستمرار في التصرف ، وهو القوة التي تصل بك إلى حياة أفضل .  قال الدكتور روبرت شولر : لا تجعل أبدا أي مشكلة تصبح عذرا ، كن منضبطا لكي تحل المشكلة "

خلصنا مفاتيح النجاح مثل ماذكرها د. ابراهيم الفقي .. أنصحكم تقرأون الكتاب كاملا .. مبدع ورائع وفيه تمارين راح تساعدكم

 هالمفاتيح لو شكلتيها وفق طريقتك بالحياة راح تصنيعين استراتيجية نجاحك .. استراتيجية خاصة فيك أنتِ وتناسبك أنتِ

شكرا لكل بنت أسهمت معي بنظرتها كيف الشخص يوصل النجاح من مفهومها الخاص .. والله  كلامات تثلج الصدر ..  :: وهذي ردودهم ..

أختكم : روضه الفضلي